Shavkat Mirziyoyev demokratik jarayonlar haqida gapirdi

Namanganlik saylovchilar bilan uchrashgan O‘zLiDep nomzodi, amaldagi prezident Shavkat Mirziyoyev demokratiya bo‘yicha fikrlarini bildirdi.

“Men uchrashuvga kelishdan oldin namanganlik tadbirkorlar bilan uchrashdim. Yoshgina tadbirkor yigit hozirgacha 100 ta ish o‘rni yaratganini, kelajakda bu ko‘rsatkichni 1000 taga yetkazish niyatida ekanini bildirdi. Endi bu yoshlarni ortga qaytarib bo‘lmaydi.

Mana biz qilgan islohotlar, mana demokratiya. Ko‘pchilik demokratiyani turlicha talqin qiladi. Men uchun demokratiya xalqimiz tinchligi, farovonligi, teng huquqliligi. Albatta, demokratiyani har bir davlat o‘zicha tushunadi. Mana, Afg‘onistondagi holat hammamizga saboq bo‘lishi kerak.

Afg‘onistondagi vaziyat har kuni diqqat markazimizda. Chegaraga daxl qilishga hech kimga yo‘l qo‘ymaymiz. Chunki O‘zbekistonda qonun ustuvor, jazo muqarrar”, – dedi Shavkat Mirziyoyev yig‘ilganlarga qarata.