KXShT kuchlari Afg‘oniston bilan chegarada harbiy mashg‘ulot o‘tkazadi

KXShT mamlakatlari harbiylari 18–23 oktyabr kunlari Tojikistonning Afg‘oniston bilan chegarasi yaqinida «Eshelon-2021» mashg‘ulotlarini o‘tkazadi. 

Mashg‘ulotlar KXShT razvedka bo‘linmalarining «Qidiruv-2021» mashg‘ulotlari bilan bir vaqtda bo‘lib o‘tadi.

Markaziy harbiy okrug xabarida aytilishicha, mashg‘ulotlarda KXShTga a'zo mamlakat hududiga kirib kelgan terrorchi guruhlarni yo‘q qilishga jalb etilgan kuchlarni moddiy-texnik ta'minlash masalalari ustida ishlanadi.

Ma'lumot berilishicha, «Eshelon-2021» mashg‘ulotlarida Belarus, Qozog‘iston, Rossiya va Tojikiston qurolli kuchlari moddiy-texnik ta'minot bo‘linmalarining 500dan ortiq harbiylari qatnashadi. 

Avvalroq Markaziy harbiy okrug Afg‘oniston bilan chegarada o‘tkaziladigan «Qidiruv-2021» mashg‘ulotlariga 200 nafar harbiy jo‘natilishini ma'lum qilgandi. Razvedkachilar mashg‘ulotlariga Belarus, Qozog‘iston, Rossiya va Tojikistondan 400dan ortiq harbiylar jalb etiladi.