КХШТ кучлари Афғонистон билан чегарада ҳарбий машғулот ўтказади

«Эшелон-2021» машғулотларида Беларус, Қозоғистон, Россия ва Тожикистон қуролли кучлари моддий-техник таъминот бўлинмаларининг 500дан ортиқ ҳарбийлари қатнашади.

Фото: РИА Новости

КХШТ мамлакатлари ҳарбийлари 18–23 октябр кунлари Тожикистоннинг Афғонистон билан чегараси яқинида «Эшелон-2021» машғулотларини ўтказади.

Машғулотлар КХШТ разведка бўлинмаларининг «Қидирув-2021» машғулотлари билан бир вақтда бўлиб ўтади.

Марказий ҳарбий округ хабарида айтилишича, машғулотларда КХШТга аъзо мамлакат ҳудудига кириб келган террорчи гуруҳларни йўқ қилишга жалб этилган кучларни моддий-техник таъминлаш масалалари устида ишланади.

Маълумот берилишича, «Эшелон-2021» машғулотларида Беларус, Қозоғистон, Россия ва Тожикистон қуролли кучлари моддий-техник таъминот бўлинмаларининг 500дан ортиқ ҳарбийлари қатнашади.

Аввалроқ Марказий ҳарбий округ Афғонистон билан чегарада ўтказиладиган «Қидирув-2021» машғулотларига 200 нафар ҳарбий жўнатилишини маълум қилганди. Разведкачилар машғулотларига Беларус, Қозоғистон, Россия ва Тожикистондан 400дан ортиқ ҳарбийлар жалб этилади.