O‘zbekistonda korrupsiya tarqalganlik darajasini baholash tizimi joriy etiladi 

Quyidagilarni nazarda tutuvchi Davlat organlari, tashkilotlari, Qoraqalpog‘iston Respublikasi, viloyatlar va Toshkent shahrida korrupsiya tarqalganlik darajasini baholash uslubiyoti tasdiqlanadi:

• keng aholi qatlami, tadbirkorlik sub'yektlari, shu jumladan O‘zbekistonda faoliyat yuritayotgan xorijiy investitsiyalar ishtirokidagi korxonalar, mahalliy va xalqaro ekspertlar o‘rtasida so‘rovnomalar o‘tkazish;
• so‘rovnomalar natijalarini tahlil qilish asosida davlat organlari va hududlarda korrupsiyaning tarqalganlik darajasini aniqlash.

Baholash natijalari asosida:

• korrupsiyaning tarqalganlik darajasi reytingi, shu jumladan korrupsiya xavfi yuqori bo‘lgan davlat organlari va hududlar ro‘yxati shakllantiriladi;
• baholash natijalari har yili 1 dekabrga qadar O‘zbekiston Respublikasi Oliy Majlisi palatalari, Prezident Administratsiyasi, Vazirlar Mahkamasi, Korrupsiyaga qarshi kurashish milliy kengashiga kiritiladi;
• baholash natijalari ommaviy axborot vositalarida, davlat va xo‘jalik boshqaruvi organlari, mahalliy ijro etuvchi hokimiyat organlarining rasmiy veb-saytlarida e'lon qilinadi.

O‘zbekiston Respublikasi Korrupsiyaga qarshi kurashish agentligiga baholash natijalari asosida quyidagilar tavsiya qilindi:

• korrupsiyaning tarqalganlik darajasi yuqori bo‘lgan davlat organlari va hududlarda korrupsiya xavfini minimallashtirishga qaratilgan tadbirlar rejasi ishlab chiqish;
• korrupsiya manbai bo‘lgan yoki unga xizmat qiladigan lavozimlar ro‘yxatini tuzish, davlat organlari tomonidan mazkur lavozimlardagi korrupsiyaviy xavf-xatarlar darajasini baholanishini va xavf-xatarlarni minimallashtirish choralarini ko‘rilishini ta'minlash;
• qonunchilikni takomillashtirish, huquqni qo‘llash amaliyotini birxillashtirish, xodimlarning mehnat sharoitlarini yaxshilash, nazorat va javobgarlikni kuchaytirishga doir takliflar ishlab chiqish.