Polsha Rossiyani Yevropadagi inflatsiyada aybladi

Polsha bosh vaziri Mateush Moravetskiy “Gazprom” va Rossiya hukumatining harakatlari hamda “Shimoliy oqim-2” gaz quvuri qurilishi tufayli Yevropada inflatsiya vujudga kelganini aytdi.

Yevrostat ma'lumotlariga ko‘ra, oktyabrda Yevrohududda yillik 2008 yil iyuldan buyon ilk bor rekord 4,1 foizlik ko‘rsatkichni tashkil qildi. Bir oy avval bu ko‘rsatkich 3,4 foizga teng edi. Moravetskiy Yevropa mamlakatlaridagi bunday yuqori inflatsiya energiya, xususan, gaz narxi oshishi natijasida kelib chiqqanini aytdi va Rossiyaning “Gazprom” kompaniyasini narxlarni ko‘tarishda aybladi.

“Bugun Yevropaning ko‘plab mamlakatlarida inflatsiya oxirgi 20-30 yildagiga nisbatan tarixiy yuqori darajada bo‘lgan vaziyatga duch keldik. Energiya narxi balandligiga “Gazprom” va Rossiya javobgar. “Shimoliy oqim-2”, bugun prezident Putinning shantaj quroliga aylangan bu quvurni bloklash o‘rniga uning qurilishiga yordamlashgan Yevropa xalq partiyasi javobgar”, — dedi Moravetskiy.

Kuzning boshida Yevropada gaz narxi keskin ko‘tarildi. Oktyabrda uning narxi ikki ming dollarga yaqinlashdi.

Ayni paytda Londondagi ICE birjasida gaz narxi 994 dollarni tashkil qilmoqda.