O‘zbekiston - Qozog‘iston biznes-forumida 5,9 mlrd dollarlik shartnomalar imzolandi

Ochilish marosimida O‘zbekiston bosh vaziri o‘rinbosari - investitsiyalar va tashqi savdo vaziri Sardor Umrzoqov hamda Qozog‘iston bosh vaziri o‘rinbosari Roman Sklyar ishtirok etdi.

Yangi tashabbus – ikki mamlakatning chegara hududida xalqaro sanoat kooperatsiyasi markazi tashkil qilinishi alohida qayd etildi. Markaz zarur ishlab chiqarish infratuzilmasi bilan jihozlanadi. Uning rezidentlari o‘zbekistonlik va qozog‘istonlik tadbirkorlarini qo‘shma sanoat korxonalarini tashkil etishga jalb qiladigan bir qator imtiyoz va preferensiyalarga ega bo‘ladi.

Tadbirlar yakunida ikki mamlakat bosh vazirlari o‘rinbosarlari O‘zbekiston bilan Qozog‘iston o‘rtasidagi iqtisodiy hamkorlikni yanada kengaytirish, mustahkam ishbilarmonlik aloqalarini o‘rnatish va qo‘shma loyiha va tashabbuslarni amalga oshirishda tadbirkorlarni har tomonlama qo‘llab-quvvatlashga sodiqligini bildirdi.

Forum yakunida umumiy qiymati 5,9 milliard dollarga teng bo‘lgan qo‘shma loyiha va tashabbuslarni amalga oshirish bo‘yicha savdo shartnomalari va ikki tomonlama bitimlar imzolandi.