Qirg‘izistonda ichki qo‘shinlar qo‘mondoni hibsga olindi

Qirg‘iziston ichki qo‘shinlar qo‘mondoni Islombek Kenjaqulov o‘ta yirik miqdorda davlat mablag‘ini talon-toroj qilishda gumonlanib hibsga olindi. Bu haqda mamlakat bosh prokuraturasiga tayanib TASS xabar berdi.

“Kenjaqulov ichki qo‘shinlardagi budjet mablag‘larining talon-toroj qilinishi ishi bo‘yicha qo‘lga olindi”, — degan agentlik manbasi.  

Dekabr boshlarida Qirg‘iziston harbiy prokuraturasi ichki qo‘shinlarning qator mansabdor shaxslariga nisbatan mamlakat jinoyat kodeksining “lavozimini suiiste’mol qilish”, “tovlamachilik”, “o‘ta yirik miqdordagi mablag‘larni o‘zlashtirish” kabi moddalari bilan jinoyat ishi qo‘zg‘atgandi.

Dastlabki surishtiruvlarda Qirg‘iziston ichki qo‘shinlaridagi mansabdor shaxslar shaxsiy tarkib uchun oziq-ovqat mahsulotlari sotib olishga mo‘ljallangan budjet mablag‘larini soxta firmalar hisobiga o‘tkazgani ma’lum bo‘lgan.

Ma’lumotlarga ko‘ra, gap 34 mln som (400 ming dollar) haqida bormoqda.