Janubiy afrikalik Nobel sovrindori Desmond Tutu vafot etdi

Keyptaunda olamdan o‘tgan Tutu JARning Nobel mukofotini qo‘lga kiritgan hali hayot bo‘lgan so‘nggi vakili edi.

“Prezident Siril Ramafosa 26 dekabrda faxriy arxiyepiskop Desmond Mpilo Tutu vafot etgani munosabati bilan barcha janubiy afrikaliklar nomidan chuqur ta’ziya bildiradi”, deb aytilgan xabarda.

Tutu JARdagi aparteid tuzumiga qarshi kurashchilardan biri bo‘lgan va buning uchun Nobel mukofoti bilan taqdirlangan. U 1985 yilda JARdagi birinchi qora tanli yepiskop, 1986 yilda esa birinchi arxiyepiskop bo‘lgan.

Tutu JARning aparteid vaqtidagi oxirgi prezidenti, mamlakatni 1989 yildan 1994 yilgacha boshqargan Frederik Villem de Klerk vafotidan bir oy o‘tib hayotdan ko‘z yumdi. De Klerkdan keyin mamlakat prezidenti lavozimini aparteidga qarshi yana bir mashhur kurashchi Nelson Mandela egallagan.

Tutu Mandela va de Klerk o‘rtasidagi muzokaralarda vositachi bo‘lgan. U Mandela hokimiyat tepasiga kelgach, aparteid vaqtida inson huquqlari buzilishlari holatlarini tergov qilish bilan shug‘ullangan qo‘mitaga rahbarlik qilgan.