Жанубий африкалик Нобел совриндори Десмонд Туту вафот этди

1984 йилги тинчлик учун Нобел мукофоти совриндори, жанубий африкалик архиепископ Десмонд Туту 90 ёшида вафот этди. Бу ҳақда ЖАР президенти девонхонаси маълум қилди.

Фото: REUTERS/Mike Hutchings

Кейптаунда оламдан ўтган Туту ЖАРнинг Нобел мукофотини қўлга киритган ҳали ҳаёт бўлган сўнгги вакили эди.

“Президент Сирил Рамафоса 26 декабрда фахрий архиепископ Десмонд Мпило Туту вафот этгани муносабати билан барча жанубий африкаликлар номидан чуқур таъзия билдиради”, деб айтилган хабарда.

Туту ЖАРдаги апартеид тузумига қарши курашчилардан бири бўлган ва бунинг учун Нобел мукофоти билан тақдирланган. У 1985 йилда ЖАРдаги биринчи қора танли епископ, 1986 йилда эса биринчи архиепископ бўлган.

Туту ЖАРнинг апартеид вақтидаги охирги президенти, мамлакатни 1989 йилдан 1994 йилгача бошқарган Фредерик Виллем де Клерк вафотидан бир ой ўтиб ҳаётдан кўз юмди. Де Клеркдан кейин мамлакат президенти лавозимини апартеидга қарши яна бир машҳур курашчи Нельсон Мандела эгаллаган.

Туту Мандела ва де Клерк ўртасидаги музокараларда воситачи бўлган. У Мандела ҳокимият тепасига келгач, апартеид вақтида инсон ҳуқуқлари бузилишлари ҳолатларини тергов қилиш билан шуғулланган қўмитага раҳбарлик қилган.

Тайёрлаган: Шуҳрат Раҳимов

#ЖАР #Нобел #Десмонд Туту