JARdagi barda otishma. O‘nga yaqin kishi halok bo‘lgan

21 dekabrga o‘tar kechasi JARning Yoxannesburg shahri chekkasidagi barda noma’lum shaxslar guruhi tomonidan o‘t ochilgan. Agence France-Presse agentligi politsiya ma’lumotiga asoslanib xabar berishicha, hujum oqibatida to‘qqiz kishi halok bo‘lib, yana o‘n kishi turli darajada tan jarohatlari olgan.

Hujum uyushtirganlar soni o‘nga yaqin bo‘lgan, ular ikkita mashinada kelishgan, bar mijozlariga qarata tartibsiz o‘q uzishgan, shundan so‘ng voqea joyidan g‘oyib bo‘lishgan. Ularning motivlari noma’lum.

Bu JARda so‘nggi bir oy ichida sodir bo‘lgan ikkinchi ommaviy otishmadir. 6 dekabr kuni noma’lum shaxslar mamlakat poytaxti Pretoriya chekkasidagi hostelda otishma uyushtirishi oqibatida 12 kishi halok bo‘lgandi.

JAR – qasddan odam o‘ldirish holatlari bo‘yicha dunyodagi eng yuqori ko‘rsatkichga ega davlatlardan biri. 64 million aholiga ega mamlakatda har kuni 60 dan ortiq odam shunday hujumlar qurboni bo‘ladi.