Normat Tursunov Zarafshon shahar hokimini jazoladi

Navoiy viloyati hokimi vazifasini bajaruvchi Normat Tursunov farmoyishi asosida Zarafshon shahar hokimi Anvar Rajabovga o‘rtacha oylik ish haqining 30 foizi miqdorida intizomiy jazo qo‘llanildi. Bunga shahar hokimining mas’uliyatsizligi sabab bo‘lgan.

Viloyat rahbarining 27 dekabrdagi farmoyishiga ko‘ra, Zarafshon shahar hokimi Anvar Rajabov zimmasiga yuklatilgan vazifalarni ta’minlashda mas’uliyatsizlikka, sustkashlikka va e’tiborsizlikka yo‘l qo‘ygan hamda mehnat va ijro intizomini buzgan. Shu sababli unga intizomiy jazo qo‘llanilgan. Hokim farmoyishiga viloyat prokuraturasining 16 dekabrdagi “Intizomiy javobgarlik to‘g‘risida ish qo‘zg‘atish haqida”gi qarori va Anvar Rajabovning tushuntirish xati asos sifatida ko‘rsatilgan. 

Oldinroq prokuratura Zarafshon shahar hokimining 59 ta farmoyishini haqiqiy emas, deb topish yuzasidan sudga ariza kiritgan va apellyatsiya sudida ham yutqazgandi.