Buxoro shahrida insonlar o‘limi bilan bog‘liq avtohalokat sodir bo‘ldi. Bir yo‘nalishda harakatlanayotgan Cobalt va Matiz o‘zaro to‘qnashib ketgan.
Foto: Ijtimoiy tarmoqlar
Buxoro viloyati IIB axborot xizmatining ma’lum qilishicha, YTH 20 fevral kuni soat 22:10 lar atrofida Buxoro shahrida sodir bo‘lgan. R.A. ismli fuqaro Cobalt mashinasini Gulchorbog‘ mahallasidan o‘tuvchi 4R/69 “a” avtomobil yo‘lida Buxoro xalqaro aeroporti tomonidan Kogon tumani tomonga boshqarib borayotib, bir yo‘nalishda harakatlanayotgan, fuqaro J.Sh. boshqaruvidagi Matiz mashinasining orqa tomonidan urib yuborgan.
YTH oqibatida Cobalt mashinasi yonib ketgan. Matiz mashinasi haydovchisi voqea joyida, Matiz yo‘lovchilari va Cobalt haydovchisi shifoxonada vafot etgan.
Holat yuzasidan Jinoyat kodeksining 266-moddasi 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
