Boysunning Qizil kanyoni turistik manzilga aylanadi

Dunyoda kanyonlar juda ko‘p. Ular yillar davomida tuproq va qoyalarning suv va shamol tufayli yemirilishidan hosil bo‘ladi. Ajib manzara ko‘plab sayyohlarni o‘ziga jalb qilib keladi.

Kanyonlarning eng mashhuri AQShning Arizona shtatidagi Grand Kanyon hisoblanadi. Qariyb 5 ming kvadrat kilometr maydonni egallagan ushbu tabiat mo‘jizasi milliy parkka aylantirilgan va u yerga har yili 5 million turist tashrif buyuradi.

*Grand Kanyon manzaralari. Foto: stock.adobe.com*

Eronning Luriston viloyatida ham sayyohlarni jalb etuvchi shunday kanyon bor

*Eronning Luriston viloyatidagi kanyon. Hodi Ganjidonish fotosi.*

Surxondaryo viloyati Boysun tumanida joylashgan Qizil kanyon ham tobora mashhur bo‘lib bormoqda. U Boysun shahridan bor-yo‘g‘i 3 km narida joylashgan.

Boysun kanyoni mahobatli bo‘lmasa-da, o‘zining qizil tusi, qoyalarning asrlar davomida sinib cho‘kishi ajib manzara hosil qilgan. Boysun kanyonida faqat bahor va kuzgi yog‘inlarda jilg‘a hosil bo‘ladi. Yoz oylarida jilg‘a quriydi.

Turizm va madaniy meros vazirligi Surxondaryo viloyati bosh boshqarmasi boshlig‘i o‘rinbosari Zebo Alimardonovaning aytishicha, ushbu go‘shani ham turistik maskanga aylantirish ustida ish olib borilmoqda. Kelgusida kanyon uzra havo sharlarida sayohatlar uyushtirish nazarda tutilgan.

Boysunga yo‘lingiz tushganda kanyon manzaralaridan bahra olishni unutmang. U shundoqqina katta yo‘l yoqasida joylashgan.

Shuhrat Shokirjonov tayyorladi.
Tasvirchi va montaj ustasi: Jahongir Aliboyev