Germaniyaning OBI kompaniyasi Rossiyadagi biznesini 1 yevroga sotdi

Germaniyaning OBI GmH qurilish va xo‘jalik mollari do‘konlari tarmog‘i rossiyalik investorlar bilan kompaniyaning oltita yuridik shaxsini sotish bo‘yicha kelishuv imzoladi. 

«Vedomosti» gazetasining yozishicha, kelishuv summasi 1 yevroni tashkil etadi.

Kelishuvning birinchi bosqichida Rossiyadagi do‘konlar tarmog‘i bilan bog‘liq firmalarning 40 foiz ulushi GISK Max investitsiya-qurilish kompaniyalari guruhiga o‘tadi, 60 foizini Supernova kompaniyalar guruhi vakili, biznesmen Yozef Liokumovich oladi.

Aniqlik kiritilishicha, keyinchalik GISK Max o‘z ulushini «uchinchi shaxslar»ga sotishi mumkin bo‘ladi.

Federal antimonopoliya xizmati mazkur kelishuvni ma’qulladi.

OBI kompaniyasining Rossiyadagi bo‘limi mazkur xabar bo‘yicha izoh berilmasligini bildirdi.

OBI GmH 17 mart kuni Rossiyadagi do‘konlari yopilishini e’lon qilgandi.