Surxondaryoda fuqaroning kartasidagi pulni o‘g‘irlagan bank xodimlari ushlandi

Bank xodimlariga nisbatan Jinoyat kodeksining 169-moddasi bilan jinoyat ishi qo‘zg‘atilib, tergov harakatlari olib borilmoqda.

Foto: IIV axborot xizmati

IIV Kiberxavfsizlik markazining xabar berishicha, Surxondaryo viloyati Oltinsoy tumanida yashovchi fuqaro O.S. IIBga murojaat qilib, o‘ziga tegishli bo‘lgan “Humo” bank kartasida bo‘lgan 48 million 640 ming 550 so‘m miqdoridagi pullar noma’lum shaxslar tomonidan yechib olinganini bildirgan.

Olib borilgan tezkor-qidiruv tadbirlari natijasida fuqaroning bank kartasidan pullarini o‘g‘irlagan shaxslar “Agrobank” Oltinsoy tumani bo‘limi xodimlari, Sho‘rchi tumanida yashovchi Q.Sh. va A.S. ekanligi aniqlangan.

Qayd etilishicha, fuqaroning pullarini o‘g‘irlagan bank xodimlariga nisbatan Jinoyat kodeksining 169-moddasi bilan jinoyat ishi qo‘zg‘atilib, tergov harakatlari olib borilmoqda.

Avvalroq, “Ipoteka-bank” ATIB Surxondaryo viloyati filialining shu’ba mudiri tadbirkorga 500 million so‘m kredit ajratib berish evaziga 10 million so‘m olayotganda ushlangan.