Toshkent shahrida ikki bosh otni o‘g‘irlab ketgan shaxslar ushlandi. Bu haqda poytaxt IIBB xabar bermoqda.
Yangihayot tumani IIO FMBga kelib tushgan xabarga ko‘ra, joriy yil 28 noyabr kuni noma’lum shaxslar 18 yoshli F.G‘.ga tegishli jami 28 000 000 so‘mlik 2 ta otni o‘g‘irlab, voqea joyidan yashiringan.
Ko‘rilgan chora-tadbirlar natijasida, ushbu jinoyatni sodir etishda gumon qilingan 34 yoshli Sh.X. va 22 yoshli X.S. aniqlanib, qo‘lga olingan. Otlar egasiga qaytarilgan.
Mazkur holat yuzasidan O‘zbekiston Jinoyat kodeksi 169-moddasi (O‘g‘rilik) bilan jinoyat ishi qo‘zg‘atilib, gumonlanuvchilarga nisbatan qamoq ehtiyot chorasi tanlangan. Tergov davom etmoqda.