Germaniya tarixidagi eng yirik bank o‘g‘riligi: birinchi muhim dalil topildi

Politsiya Gelzenkirxendagi Sparkasse banki o‘g‘irlanishi bo‘yicha tergovda birinchi muhim dalilni oldi. Bu holat Germaniya tarixidagi eng yirik o‘g‘riliklardan biri sifatida baholanmoqda. Dpa agentligi dushanba, 5 yanvar kuni xabar berishicha, tergovchilar jinoyatchilarning avtomobiliga tegishli bo‘lgan davlat raqam belgilarini aniqlagan.

Jurnalistlar ma’lumotiga ko‘ra, davlat raqamlari Dortmundda topilgan. Hozir ular haqiqatdan ham o‘g‘rilarga tegishli bo‘lgan-bo‘lmaganini aniqlash uchun tekshiruv o‘tkazilmoqda.

Bild tabloidi yozishicha, ushbu raqamlar Dortmund vokzalidagi taksi turargohi yonida joylashgan chiqindi konteynerida qoldirilgan bo‘lgan. Bu haqda guvoh telefon orqali politsiyaga xabar bergan. Bundan oldin politsiya jinoyatchilar foydalangan deb hisoblangan avtomobillar suratlarini e’lon qilgan edi. Ushbu tasvirlarda mashinalarning raqamlari ham ko‘rinib turgan.

29 dekabr ertalab Gelzenkirxendagi Sparkasse filiali xavfsizlik xizmati bank omborida 3200 dan ortiq seyf-yashiklar — pul, oltin va qimmatbaho buyumlar saqlanadigan quticha/yacheykalar buzib ochilganini aniqlagan. Jinoyatchilar omborga yondosh avtoturargoh tomonidan devorni teshib kirgan.

Dpa agentligi xavfsizlik xizmatlaridagi noma’lum manbalariga tayanib, zarar miqdori 100 mln yevro deb baholanayotganini xabar qildi.

Guvohlar ko‘rsatmasiga ko‘ra, 28 dekabr kechqurun ko‘p qavatli avtoturargohda katta sumkalar ko‘targan erkaklar payqalgan. Kuzatuv kameralari yozuvlari esa ertasi kuni ertalab avtoturargohdan qora Audi RS 6 chiqib ketganini ko‘rsatgan — mashinaning ichidagilar niqobda bo‘lgan. Avtomobilning davlat raqami bundan oldin Hannoverda o‘g‘irlab ketilgan. Politsiyada o‘g‘rilarning harakatlari “juda professional” deb baholangan.

29 va 30 dekabr kunlari bank filiali binosiga norozi mijozlar kelgan. Ko‘pchilik o‘z yo‘qotishlari sug‘urta qoplamasidan ancha yuqori ekanini aytgan. Sparkasse bank tomoni esa har bir seyf 10 300 yevrogacha sug‘urtalanganini bildirgan. Jami taxminan 2700 kishi jabr ko‘rgan.