Turkmanistonda yangi shahar sobiq prezident sharafiga nomlandi

Turkmanistonda Ahal viloyatining yangi ma’muriy markazi shahar maqomini oldi va Arkadag deb nomlandi.

Foto: AP

Bu haqda Turkmaniston hukumati majlisida Milliy Gengesh parlamenti raisi Gulshot Mammedova ma’lum qildi. Uning aniqlik kiritishicha, qaror qabul qilishda barcha viloyatlar aholisining xohish-istaklari, jamoat tashkilotlarining takliflari inobatga olingan.

Arkadag (Orqatog‘, homiy) - Turkmanistonning ikkinchi prezidenti va hozirgi davlat rahbari Serdar Berdimuhamedovning otasi Gurbanguli Berdimuhamedovning unvoni hisoblanadi. Yangi shaharga nom tanlash birinchi prezident Saparmurod Niyozov (unvoni - Turkmanboshi) vafot etgan kuni e’lon qilindi.

Avvalroq, Turkmanistonda Saparmurod Niyozov va uning onasi Gurbansulton ejye sharafiga nomlangan bir necha shahar va qishloqlar nomi o‘zgartirilgan edi.

Ahal - Turkmanistonning beshta viloyatidan biri bo‘lib, mamlakatning markaziy va janubiy qismlarini egallaydi.

Taxminan 70 ming kishi istiqomat qiladigan yangi ma’muriy markaz Ashxoboddan 30 km janubi-g‘arbda joylashgan 950 gektar maydonda qurilmoqda. Mega-loyihani amalga oshirish 2019 yilda boshlangan.