Toshkent va Buxoro o‘rtasidagi «Afrosiyob» qatnovlari yana 5 kunga to‘xtatildi

Toshkent va Buxoro shaharlarini bog‘lovchi tezyurar «Afrosiyob» poyezdi qatnovlari yana besh kunga to‘xtatildi. Bunga O‘zbekistonda davom etayotgan anomal sovuq sabab bo‘ldi, deb xabar berdi «O‘ztemiryo‘lyo‘lovchi».

«Anomal sovuq ob-havo tufayli, yo‘lovchi poyezdlar harakat xavfsizligini ta’minlash va yo‘lovchilarni o‘z manzillariga yetkazish davomida noqulayliklar kelib chiqishining oldini olish maqsadida, «Toshkent – Buxoro – Toshkent» yo‘nalishidagi «Afrosiyob» elektropoyezdi qatnovlarining 16-20 yanvar kunidagi 5 ta reysi bekor qilinadi», deyiladi xabarda.

Xarid qilingan chiptalarni temiryo‘l chiptaxonalarida, elektron chiptalarni chipta.railway.uz saytida 100 foiz qiymatda qaytarish mumkin.

Shu bilan birga, «Afrosiyob» reyslari bekor qilingani sababli, 16-20 yanvar kunlari «Toshkent-Buxoro-Toshkent» yo‘nalishida harakatlanadigan «Sharq» tezyurar poyezdiga qo‘shimcha to‘rttadan vagon ulanadigan bo‘ldi.

Bundan avval «Afrosiyob» poyezdining Toshkent—Buxoro—Toshkent yo‘nalishida 13-15 yanvar kunlariga belgilangan 3 ta reysi bekor qilingandi.