Yashnoboddagi maktabda yuzaga kelgan holat bo‘yicha ish prokuraturaga oshiriladi 

Kun.uz manbasi xabariga ko‘ra, Maktabgacha va maktab ta’limi vaziri Hilola Umarova topshirig‘i bilan shakllantirilgan ishchi guruh tarkibida vazirlikning huquqshunoslari, axborot xizmatidan xodimlar hamda Toshkent shahar maktabgacha va maktab ta’limi bosh boshqarmasidan vakillar bo‘lgan.

Ammo jamoatchilikdan hech kim qatnashmagan. Vaholanki, vazirlik rasmiy munosabatida o‘rganishlarda jamoatchilikdan ham odamlar qatnashishi aytilgandi.

Shuningdek, manbaga ko‘ra, mas’ullardan iborat ishchi guruh 152-maktabdagi ta’lim jarayoni, dars sifati, moliyaviy tomonlarini kompleks o‘rgangan.

“O‘rganish davomida materiallar yig‘ilib, huquqiy baho berish uchun prokuraturaga oshirilishi kutilmoqda. Yakuniy xulosa prokuraturaning o‘rganishidan keyin bo‘ladi”, dedi manba.

Eslatib o‘tamiz, pedagog va bolaning o‘zaro janjali aks etgan videolar ijtimoiy tarmoqlarda tarqalgach, 11 mart kuni maxsus ishchi guruh tuzilgandi.