Rossiya Norvegiyaning o‘n nafar diplomatini chiqarib yubordi

Norvegiyaning Moskvadagi elchixonasi va mudofaa attashesi idorasining o‘n nafar vakili persona non grata deb e’lon qilindi. Bu haqda 26 aprel, chorshanba kuni Rossiya Tashqi ishlar vazirligi ma’lumot berdi.

Norvegiya elchisi Robert Kvile Rossiya Tashqi ishlar vazirligiga chaqirildi. U Osloning Rossiyaning Norvegiyadagi elchixonasidan 15 nafar diplomat va harbiy attashe idorasi xodimlarini chiqarib yuborish qaroriga nisbatan “qattiq norozilik” oldi, deya ma’lum qildi Moskva. Diplomatga nota topshirilgan. Norvegiya elchisiga, shuningdek, boshqa chora-tadbirlar, jumladan, Norvegiya diplomatik vakolatxonalari tomonidan Rossiya fuqarolari orasidan xodimlarni yollashga cheklovlar qo‘yilishi aytildi.

Shu bilan birga, to‘rtta teleradioeshittirish korporatsiyasi - Shvetsiyadagi SVT, Norvegiyadagi NRK, Daniyadagi DR va Finlandiyadagi Yle - surishtiruv o‘tkazdi hamda Skandinaviya mamlakatlaridagi Rossiya elchixonalari ko‘plab xodimlarining Rossiya razvedka xizmatlari bilan aloqasi bor, degan xulosaga kelishdi.

SVT 21 nafar rossiyalik razvedka xodimini aniqladi, ulardan kamida 13 nafari Rossiyaning Stokholmdagi elchixonasida 2022 yil apreligacha ishlagan, deb yozadi Yle.