Makkada xorazmlik ayollar o‘g‘irlik qilgani va qidiruvga berilgani rad etildi

Ularni ijtimoiy tarmoqlarda obro‘sizlantirishga uringan shaxslar aniqlangan.

Xorazm viloyatida istiqomat qiluvchi uch nafar xotin-qiz Makkaga ziyoratga borganida do‘konchilarning namozga ketganidan foydalanib, zargarlik buyumlarini o‘g‘irlagani, Saudiya Arabistoni ularni qidiruvga bergani, ularning qo‘li kesilishi yoki kallasidan judo qilinishi haqida ijtimoiy tarmoqlarda foto va ovozli xabarlar tarqalgan edi.

Bu ayollar Xorazm viloyati Ichki ishlar boshqarmasiga ariza bilan murojaat qilganidan keyin, ushbu ovozli xabarlarni tarqatgan shaxslar aniqlangan.

Dastlabki surishtiruvlar jarayonida ular ushbu ovozli xabarlarni hech qanday asossiz tarqatgani ma’lum bo‘lgan.

Hozirgi paytda ovozli xabarlarni tarqatgan shaxslarning xatti-harakatlari yuzasidan tergovga qadar tekshiruv ishlari olib borilmoqda.