«Urush va tinchlik» Rossiyada eng ommabop raqamli klassik kitobga aylandi

Lev Tolstoyning «Urush va tinchlik» romani o‘tgan yil davomida «Liters» platformasida rus klassik asarlari orasida eng mashhur raqamli kitobga aylandi - u 74 000 martadan ko‘proq yuklab olingan. Bu haqda servis ma’lumotlariga tayanib, «Vedomosti» nashri xabar bermoqda. 

Kompaniya ma’lumotlariga ko‘ra, Fyodor Dostoyevskiyning «Jinoyat va jazo» romani so‘nggi 12 oy ichida yuklab olingan asarlar soni bo‘yicha ikkinchi o‘rinni egalladi, u 64 ming marta yuklab olingan. Uchinchi o‘rinda Tolstoyning «Anna Karenina» romani (62 ming marta yuklab olingan), to‘rtinchi o‘rinda Mixail Bulgakovning «Morfiy» qissasi joylashgan. Dostoyevskiyning «Telba» romani bor-yo‘g‘i beshinchi o‘rinni egalladi – bir yil avval u reyting yetakchisi bo‘lgan edi. 

Bundan tashqari, rus klassik asarlari o‘ntaligiga Yevgeniy Zamyatinning «Biz» antiutopiya romani, Fyodor Dostoyevskiyning «Aka-uka Karamazovlar», Ilya Ilf va Yevgeniy Petrovning «Bir qavatli Amerika», Aleksandr Pushkinning «Kapitan qizi», Nikolay Gogolning «O‘lik jonlar» romani kiradi. «Litres» tahlilchilariga ko‘ra, Mixail Bulgakovning «Usta va Margarita» romani bu yil eng yaxshi 10 talikdan tushib qolgan. 

Avvalroq Rossiya kitob uyushmasi va nashriyotlar vakillari so‘nggi bir yil ichida Rossiyada kitoblar narxi taxminan 20 foizga oshgani haqida xabar bergan edi. 2023 yil oxiriga borib, narxlar yana 15 foizga ko‘tariladi, deya ma’lum qildi nashriyotchilar. Ular buni hozir Xitoy va boshqa Osiyo davlatlarida sotib olinadigan bosma mahsulotlar narxining oshishi bilan izohlamoqda. Bundan tashqari, rubl kursi va talabning pasayishi xarajatlar o‘sishiga ta’sir qiladi.