Namanganda sof quyma oltin sotayotgan shaxslar ushlandi

Davlatobod tumanida sof quyma oltin sotayotgan shaxslar ushlandi. Holat yuzasidan valuta qimmatliklarini qonunga xilof ravishda olish yoki o‘tkazish bilan jinoyat ishi qo‘zg‘atildi.

Bosh prokuratura huzuridagi Departament hamda DXXning Namangan viloyati boshqarmalari tomonidan tezkor tadbir o‘tkazildi.

Unda, Davlatobod tumanida yashovchi B.S. va N.K. 3 dona oltinga o‘xshash sariq rangli quyma metallni fuqaro E.A.ga 20 000 AQSh dollariga sotgan vaqtida ashyoviy dalillar bilan ushlangan.

Ekspertiza xulosasiga ko‘ra, 3 dona sariq rangli metall umumiy vazni 298,43 gramm bo‘lgan “992” probali sof oltin ekanligi qayd etilib, 222,8 mln so‘mga baholangan. 

Mazkur holat yuzasidan Jinoyat kodeksining 177-moddasi (valuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.