Erdo‘g‘an Rossiyaga «g‘alla bitimi»ni muhokama qilish uchun tashrif buyuradi

Turkiya prezidenti Rajab Toyyib Erdo‘g‘an tez orada Sochiga tashrif buyuradi, u yerda Rossiya tomoni bilan g‘alla bitimi muhokama qilinadi, deb xabar berdi dushanba kuni Turkiya hukmron partiyasi matbuot kotibi Omer Chelik.

Avvalroq Rossiya prezidentining matbuot kotibi Dmitriy Peskov Vladimir Putin va Rajab Toyyib Erdo‘g‘an o‘rtasidagi uchrashuv tez orada bo‘lib o‘tishi, sanalar bo‘yicha kelishuvlar borligini ma’lum qilgandi. Shuningdek, Erdo‘g‘anning Rossiyaga tashrifi 9-10 sentabr kunlariga rejalashtirilgan va Hindistonda bo‘lib o‘tadigan G20 sammiti oldidan amalga oshirilishi ma’lum qilindi. 

«Yaqin kunlarda janob prezident Sochiga tashrif buyurishi kutilmoqda. Bu mavzu (g‘alla bitimi) muhokama qilinishi kutilmoqda. Janob prezident bu yerda tashabbuslar bilan chiqmoqda, ijobiy natijalarga umid qilamiz», - dedi Chelik dushanba kuni brifingda. 

«G‘alla yo‘lagi»ning yopilishi

G‘alla bitimining amal qilishi 2023 yil 18 iyulda to‘xtatildi. Shundan so‘ng Moskva Turkiya, Ukraina va BMTga «g‘alla yo‘lagi»ning uzaytirilishiga qarshi ekanligini ma’lum qildi. 

Rossiya prezidenti Vladimir Putin ushbu bitimning Rossiyaga nisbatan shartlari bajarilmaganini bir necha bor ta’kidladi. Kremlga ko‘ra, g‘arb davlatlari o‘z va’dalarini bajarmoqchi bo‘lmagani uchun BMTning g‘alla kelishuvi bo‘yicha urinishlari hozircha muvaffaqiyatsizlikka uchragan. 

Rossiya prezidenti, shuningdek, g‘arb Ukraina g‘allasining katta qismini o‘z mamlakatlariga eksport qilganiga e’tibor qaratdi, aslida bu kelishuvning asosiy maqsadi - g‘alla, oziq-ovqat yordamiga juda muhtoj bo‘lgan mamlakatlarga, shu jumladan Afrikaga uni yetkazib berish edi.

O‘tgan yakshanba, 20 avgust kuni Turkiya va Birlashgan Millatlar Tashkiloti g‘alla bitimini qayta tiklash bo‘yicha loyiha takliflarini ishlab chiqishni boshlagani xabar qilindi, biroq manfaatdor tomonlar texnik delegatsiyalari uchrashuvining sanasi haligacha ma’lum qilinmadi.