Zelenskiyning AQSh senatorlari bilan uchrashuvi: tafsilotlar va fotosuratlar 

Uchrashuvda Senatdagi Demokratik partiya yetakchisi Chak Shumer, Senatdagi Respublikachilar partiyasi yetakchisi Mitch Makkonell va boshqa senatorlar ishtirok etdi.

Zelenskiy senatorlarga o‘rta muddatli harbiy vazifalar haqida ma’lumot berdi. U keyingi yilda Ukraina tajovuzkorga bosim o‘tkazishda davom etishini, shu bois AQSh tomonidan qo‘llab-quvvatlanishi juda muhimligini ta’kidladi. Xususan, uzoq masofali qurollarga ehtiyoj borligi qayd etildi.

Shuningdek, uchrashuvda Rossiyaning havodagi harbiy imkoniyatlarini pasaytirish, tinch aholini, muhim va don infratuzilmasini himoya qilish uchun Ukrainaning havo mudofaasini kuchaytirish muhimligi muhokama qilindi.

Zelenskiy ta’kidlaganidek, Ukraina shaharlarini himoya qilish odamlarning qaytishi, iqtisodiy o‘sish va iqtisodiy mustaqillikka tezroq erishish uchun nihoyatda muhim. U urush ketayotgan 2023 yilda ham Ukraina iqtisodiyoti 5 foizga o‘sganini ta’kidladi.

Bundan tashqari, Zelenskiy senatorlar savollariga javob berar ekan, Ukraina tomonidan tashkil etilgan muqobil «g‘alla yo‘lagi»ga Rossiya tomonidan xalaqit berishga urinishlar haqida gapirib, yuk tashish hajmi baribir o‘sayotganini aytdi.

Zelenskiy, shuningdek, Ukraina Xalqaro valuta jamg‘armasi va Yevropa komissiyasi oldidagi barcha majburiyatlarini bajarganini ta’kidladi.

U bundan buyon ham korrupsiyaga qarshi qat’iy kurash olib borishiga, korrupsiyaga qarshi infratuzilmani sezilarli darajada mustahkamlashga harakat qilishiga ishontirdi.

Zelenskiyning amaliy tashrifi Amerika siyosatida Ukrainaga yordam uchun taxminan 61 milliard dollar miqdorida qo‘shimcha moliyalashtirishni ma’qullash bo‘yicha kelishmovchiliklar fonida sodir bo‘lmoqda. =

Vashingtondagi muzokaralarda Ukraina va AQSh o‘rtasidagi mudofaa sohasidagi hamkorlikni davom ettirish, xususan, qurol-yarog‘ va havo hujumidan mudofaa tizimlarini ishlab chiqarish bo‘yicha qo‘shma loyihalar, shuningdek, kelasi yilda ikki davlat o‘rtasidagi sa’y-harakatlarni muvofiqlashtirish masalalari asosiy mavzular bo‘lishi kutilmoqda.