O‘zbek pazandachilik san’ati muzeyi tashkil etiladi

Quyidagilar O‘zbekistonning gastronomik turizm salohiyati va milliy pazandachilik san’atini ommalashtirishning ustuvor yo‘nalishlari etib belgilanadi:

• O‘zbekistonning gastronomik turizm salohiyatini keng targ‘ib etish orqali mamlakatga tashrif buyurayotgan sayyohlar oqimini oshirish;
• milliy pazandachilikni sanat darajasiga ko‘tarish va “O‘zbek milliy taomlari brendini” yaratish;
• gastronomik turizm yo‘nalishda xizmatlar ko‘rsatish sifatini yanada takomillashtirish.

Turizm qo‘mitasi, Savdo-sanoat palatasi va O‘zbekiston Oshpazlar uyushmasining uyushma huzurida Xalqaro o‘zbek pazandachilik san’ati markazi hamda O‘zbek pazandachilik san’ati muzeyini tashkil etish to‘g‘risidagi takliflariga rozilik beriladi.

Uyushmaga quyidagi qo‘shimcha vazifalar yuklanadi:

• gastronomik turizmni yanada ommalashtirish va xalqaro darajadagi oshpazlarni tayyorlash ishlarini tashkil etish;
• zamonaviy talablarga muvofiq sohada oshpazlar, pazandalar, qandolatchilar, ofitsiantlar va boshqa mutaxassislarini tayyorlash, ularning kasbiy malakalarini oshirish va qayta tayyorlash ishlarini tizimli ravishda tashkil etish;
• umumiy ovqatlanish tarmog‘ini rivojlantirish dasturlarini ishlab chiqish va amalga oshirish;
• xalqaro ko‘rgazmalarida qatnashish orqali o‘zbek pazandachiligi san’atini targ‘ib qilish va ijobiy nufuzini oshirish;
• respublikada, shu jumladan hududlarda umumiy ovqatlanishni tashkil etishga oid tanlovlar, ko‘rgazmalar, festivallar va maxsus kunlar, madaniy-ma’rifiy tadbirlar tashkil etish;
• sohani raqamlashtirish va axborot xizmatlarini tashkil etish, maxsus nashrlar, kitoblar, jurnallar va bukletlar, elektron nashrlarni tayyorlash va shu jumladan xorijiy mamlakatlarda tarqatish, shuningdek ommaviy axborot vositalarida faol yoritish;
• umumiy ovqatlanish korxonalar faoliyatiga va taraqqiyotiga to‘siq bo‘layotgan muammolarni aniqlash, tahlil qilish, ularni bartaraf qilish bo‘yicha vakolatli davlat organlariga takliflar tayyorlash hamda o‘z vakolati doirasida tadbirlarni amalga oshirish;
• umumiy ovqatlanish sohasida ilmiy salohiyatga ega oliy ta’lim muassasalari bilan hamkorlikda ilmiy-tadqiqot ishlarini olib borish;
• xalqaro miqyosda o‘tkaziladigan sohasiga doir barcha anjumanlar, simpoziumlar, kongresslar, ko‘rik-tanlovlar, festivallarda o‘z a’zolari ishtirok etishini ta’minlash.