Belarus prezidenti: G‘arb mojarolarni qo‘zg‘ashda davom etmoqda

G‘arb ko‘p millionli qochqinlar oqimini keltirib chiqaradigan mojarolarni qo‘zg‘ashda davom etmoqda.

Bu haqda Belarus prezidenti Aleksandr Lukashenko «Global janub ovozi» uchinchi sammitida ma’lum qildi.

Davlat rahbari G‘arb hukmronligi davri o‘tmishga aylanib borayotganini alohida ta’kidlab, global taraqqiyot, iqtisodiy tortishish va siyosiy qarorlar qabul qilish markazi janub va sharqqa siljiyotganini bildirdi.

«Bu bizdan xalqaro masalalarda ko‘proq yetakchilikni talab qiladi. Global janubning ovozi to‘liq eshitilishi va uning ulkan salohiyatiga mos kelishi kerak», — dedi Belarus rahbari.

Muxoliflar kuchayib borayotgan bu kuchni his qilmoqda va unga qarshi turishga urinmoqda, deb hisoblaydi Lukashenko.

Hindiston bosh vaziri «global muammolarning aksariyati Global janub tomonidan yaratilmagan, ammo ular bizga ko‘proq ta’sir qilyapti», deb aytganida mutlaqo to‘g‘ri edi, dedi prezident.

Uning so‘zlariga ko‘ra, Belarus buni o‘z tajribasidan yaxshi biladi. «Biz bir necha yillardan buyon noqonuniy, adolatsiz, vahshiyona sanksiyalar ostida yashayapmiz, bu nafaqat mamlakatimizga, balki sizlarning xalqingizga ham salbiy ta’sir ko‘rsatmoqda», — dedi siyosatchi.

G‘arb ko‘p millionli qochqinlar oqimini keltirib chiqaradigan mojarolarni qo‘zg‘ashni davom ettirmoqda, keyin esa migratsiya inqirozida behayolik bilan Global janubni va bizni ayblamoqda, dedi prezident. «Ammo, asl sabab – resurslarni so‘ndirish va rivojlanayotgan mamlakatlarga teng bo‘lmagan ayirboshlash tizimini joriy etishdir», deb hisoblaydi Lukashenko.

U bugungi kunda ko‘plab mintaqalar transmilliy korporatsiyalar manfaati uchun urushlar va mojarolar bilan larzaga kelganiga, qurollanish poygasi misli ko‘rilmagan darajada kuchayib borayotganiga e’tibor qaratdi.

«Ammo barqaror tinchlik va global qarama-qarshiliklarni hal qilmasdan turib, hech qanday rivojlanish mumkin emas. Shu bois Belarus bir necha bor tinchlik tashabbuslari bilan chiqdi va nizolarni hal etish bo‘yicha muzokaralar platformasi rolini o‘z zimmasiga oldi», — dedi davlat rahbari.

Belarus bu ishni izchil davom ettiradi, dedi u. «Bizni birlashtirgan xalqaro tuzilmalar: BMT, Qo‘shilmaslik harakati, Shanhay hamkorlik tashkiloti, shuningdek, biz sherik bo‘lishni kutayotgan BRIKSda faol ishtirok etib, yaqin kelajakda global ko‘pchilikni mustahkamlashga hissa qo‘shishni maqsad qilganmiz», - deya qo‘shimcha qildi prezident.