Yaponiyada muddatidan oldin saylovlar o‘tkaziladi

Yaponiyaning hukmron Liberal-demokratik partiyasi (YaLDP) yangi raisi Shigeru Ishiba muddatidan oldin parlament saylovlarini o‘tkazish niyatida. «Yangi hukumat imkon qadar tezroq xalq hukmini eshitishi muhim», dedi Ishiba 30 sentabr, dushanba kuni. Navbatdan tashqari saylovlar rejalashtirilganidan bir yil oldin, 27 oktyabrda bo‘lib o‘tishi kerak.

67 yoshli Shigeru Ishiba 27 sentabr kuni YaLDP rahbari etib saylangan edi. Ovoz berish ikki turda bo‘lib o‘tdi, chunki dastlab to‘qqiz nomzodning hech biri ko‘pchilik ovoz to‘play olmagan. Ishiba 1 oktyabrda parlament tomonidan tasdiqlangach, mamlakatning yangi bosh vaziri bo‘lishi kutilmoqda.

U YaLDP raisi etib saylanganidan beri Tokio fond birjasida Nikkei fond indeksi to‘rt foizga tushib ketdi, chunki siyosatchi inflatsiyaga qarshi kurashish uchun qat’iy pul-kredit siyosati va foiz stavkalarini oshirish tarafdori sifatida ko‘riladi.