Fayzulla Xo‘jayevning jiyani professor Sulaymon Inoyatov vafot etdi

19 noyabr kuni Buxoro davlat universiteti professori, tarixchi olim, pedagog Sulaymon Inoyatov 87 yoshida vafot etdi. Bu haqda Buxoro davlat universiteti rasmiy telegram kanalida xabar qilindi.

Sulaymon Inoyatov 1938 yil 12 mart kuni Shexon qishlog‘ida Inoyatxo‘ja Atoullayev (1890—1987) va Supiya Inoyatova (1900—1983) oilasida tug‘ilgan. Oilaning kelib chiqishi Buxorodagi mashhur Xo‘jayevlar sulolasiga borib taqaladi.

Inoyatov 1956-1961 yillarda Buxoro davlat pedagogika institutida tarix-filologiya fakultetini tamomlagan. 1984-1989 yillarda Buxoro davlat pedagogika institutida kafedra mudiri, 1989-1992 yillarda ilmiy ishlar bo‘yicha prorektor, 1992-1995 yillar davomida universitetning tarix fakulteti dekani lavozimlarida ishlagan.

Sulaymon Inoyatov 10 ta monografiya, 15 dan ziyod o‘quv-uslubiy qo‘llanma, 300dan ortiq ilmiy maqola va tezislar muallifi. O‘n minglab shogirdlarga ustozlik qilgan. 2023 yilda “El-yurt hurmati” ordeni bilan taqdirlangan.

Kun.uz marhumning yaqinlari, do‘stlari va shogirdlariga chuqur hamdardlik bildiradi.

Oldinroq Kun.uz muxbiri Sulaymon Inoyatov bilan Fayzulla Xo‘jayev haqida suhbat qilgan edi.