Samarqandda 5,5 mlrd so‘mlik elektr energiyasi talon-toroj qilindi

«O‘zenergoinspeksiya» Samarqand viloyat hududiy boshqarmasi va viloyat prokuraturasi hamda Iqtisodiy jinoyatlarga qarshi kurashish departament boshqarmasi hamkorligida o‘tkazilgan nazorat tadbirlarida elektr energiyasidan foydalanishda qoidabuzarlikka yo‘l qo‘yish holatlari aniqlandi.

Xususan, Toyloq tumanida joylashgan «S.Sh.O.» fermer xo‘jaligi foydalanilgan elektr energiyasi uchun tabaqalashtirilgan tarif bo‘yicha hisob-kitoblarni amalga oshirilmay kelish natijasida ta’minot korxonasiga 4 milliard 637 million so‘m zarar yetkazilgani ma’lum bo‘lgan.

Ushbu tumandagi «P.A.O.» MChJ (537,7 million so‘m) va «P.M.W.» MChJda (371,3 million so‘m) ham tabaqalashtirilgan tarif bo‘yicha hisob-kitoblarni amalga oshirilmay kelgani aniqlangan.

Mazkur holatlar yuzasidan tegishli hujjatlar rasmiylashtirilib, huquqni muhofaza qiluvchi organlarga yuborilgan.

Avvalroq Toshkent shahrida metallni qayta ishlash zavodi 26,9 milliard so‘mlik elektr energiyasidan noqonuniy foydalangani fosh etilgani to‘g‘risida xabar berilgandi.