Suriyaning yangi rahbari ilk xorijiy safarini Saudiya Arabistoniga amalga oshirdi

Suriyaning o‘tish davri prezidenti Ahmad ash-Shar’a 2 fevral kuni o‘zining ilk xorijiy safarini amalga oshirib, Ar-Riyod shahriga tashrif buyurdi. U mamlakat valiahd shahzodasi Muhammad bin Salmon Ol-Saud bilan uchrashuv o‘tkazdi.

«Unga tashqi ishlar vaziri Asaad ash-Shibaniy hamrohlik qildi», — deyiladi xabarda.

Qayd etilishicha, valiahd shahzoda va Shar’a Ar-Riyod hamda Damashq o‘rtasidagi ikki tomonlama munosabatlarni, turli sohalardagi hamkorlikni mustahkamlash imkoniyatlarini muhokama qilgan. Shuningdek, ular mintaqani rivojlantirish va bu yo‘nalishda tegishli sa’y-harakatlarni amalga oshirish masalasiga ham to‘xtalib o‘tgan.

Bundan tashqari, tomonlar gumanitar va iqtisodiy hamkorlikni, shuningdek, tinchlik va barqarorlikni saqlashga qaratilgan qo‘shma loyihalarni, haqiqiy sheriklikka erishish uchun energiya, texnologiya, ta’lim va sog‘liqni saqlash sohalarida keng ko‘lamli rejalarini muhokama qilgan.

29 yanvar kuni Suriya administratsiyasi rahbari Ahmad ash-Shar’a mamlakatning o‘tish davridagi prezidenti sifatida e’lon qilingan edi. Yangi hukumat, shuningdek, oldingi konstitutsiya bekor qilinishi va parlament tarqatib yuborilishini e’lon qildi. Barcha xavfsizlik xizmatlari va qurolli tuzilmalar tarqatiladi — ularning o‘rniga fuqarolar xavfsizligini ta’minlaydigan yangi tuzilma paydo bo‘ladi.