Gurjistonda namoyishchilarga nisbatan jazo kuchaytirildi

Gurjistonda namoyishchilarga nisbatan jazo choralarini kuchaytiruvchi tuzatishlar kuchga kirdi, deb xabar berdi 7 fevral, juma kuni mahalliy OAV. Bir kun avval hukmron «Gurjiston orzusi» partiyasi deputatlari tomonidan tezlashtirilgan tarzda qabul qilingan qonunchilik paketi allaqachon mamlakat prezidenti Mixail Kavelashvili tomonidan imzolanib, e’lon qilingan.

Paper Kartuli nashrining yozishicha, Gurjiston Ma’muriy javobgarlik to‘g‘risidagi kodeksiga mansabdor shaxslarni haqorat qilish bo‘yicha ma’muriy modda qo‘shilgan bo‘lib, u 45 sutkagacha qamoqqa olish yoki 4000 larigacha (taxminan 1400 dollar) jarima solishni nazarda tutadi. Jinoyat kodeksiga kiritilgan o‘zgartirishlar politsiya xodimlariga bo‘ysunmaslik, tahdid va hujumlar haqidagi moddalarga tegishli. Ushbu jinoyatlar uchun qamoq jazosi oshirildi. Zo‘ravonlikka ommaviy chaqiriqlar endi qamoq bilan ham jazolanishi mumkin.

Mitinglar o‘tkazish qoidalariga o‘zgartirishlar kiritildi

Ba’zi tuzatishlar miting va norozilik namoyishlarini o‘tkazish qoidalariga tegishli. Endi, jazo tahdidi ostida, namoyishchilarga ko‘priklar, temiryo‘llar, avtomobil yo‘llari, tunnellar va «munitsipalitet tomonidan belgilangan» transport uzellarini to‘sib qo‘yishga ruxsat berilmaydi. Shuningdek, fuqarolarning o‘tishiga to‘sqinlik qilish va politsiya to‘xtatib qo‘yishni talab qilgan aksiyada qatnashish taqiqlanadi.

Bundan tashqari, mayda bezorilik va buzg‘unchilik, politsiya xodimiga bo‘ysunmaslik yoki haqorat qilish, miting qoidalariga rioya qilmaslik, ma’muriy binolar va yo‘llarni to‘sib qo‘yish, namoyishlarda niqob va lazerlardan foydalanish uchun jarima va ma’muriy qamoqqa olish muddatlari oshirilmoqda.