Ufada neftni qayta ishlash zavodi yonib ketdi

Ufa neftni qayta ishlash zavodida ("Bashneft") yong‘in kuzatilmoqda. Bu haqda 3 mart, dushanba kuni Rossiya Favqulodda vaziyatlar vazirligi hududiy bosh boshqarmasi matbuot xizmati ma’lum qildi.

«Bugun tunda Rossiya Favqulodda vaziyatlar vazirligining kuch va vositalari Ufa neftni qayta ishlash zavodi hududida sodir bo‘lgan yong‘in haqida yuqori darajadagi xabar bo‘yicha jo‘nab ketdi», — deya «Interfaks» agentligi matbuot xizmatidan iqtibos keltirmoqda.

Favqulodda vaziyatlar vazirligi ma’lumotlariga ko‘ra, yong‘in yoqish pechi hududida sodir bo‘lgan.

Idoraning ta’kidlashicha, yaqin atrofdagi aholi uchun xavf yo‘q. Voqea joyiga havo sifatini nazorat qilish uchun laboratoriya yuborilgan.

Mash: Fuqarolar dronlar shovqinini eshitgan

Mash Telegram-kanaliga ko‘ra, zavodda portlash sodir bo‘lgan va undan oldin «fuqarolar dronlar shovqinini eshitishgan». Hatto kvartiralarda ham silkinishlar sezildi, deya qo‘shimcha qilindi.

SHOT Telegram-kanaliga ko‘ra, yong‘in 100 kvadrat metr maydonni qamrab olgan, qurbonlar haqida ma’lumot yo‘q. Kanal shuningdek, portlash haqida xabar bergan. «Qattiq ovozdan avtomobillar signallari ishlab ketdi», deyiladi xabarda.

Yong‘in boshlanganidan bir necha soat o‘tgach, Favqulodda vaziyatlar vazirligining Boshqirdiston departamenti yong‘in o‘chirilgani haqida xabar berdi. Qurbonlar haqida ma’lumot yo‘q.