Isroil: G‘azoda bir necha oyga yetadigan oziq-ovqat bor

G‘azo sektorida oziq-ovqat va zaxiralar yetarli, biroq Hamas a’zolari ularni tinch aholiga bermayapti. Bu haqda Isroil hukumati matbuot kotibi Devid Menser 3 mart, dushanba kuni Quddusda bo‘lib o‘tgan matbuot anjumanida Isroil sektorga yuk tashishni to‘xtatganiga izoh berib aytib o‘tdi.

«G‘azoda oziq-ovqat va zaxiralar yetarli. O‘t ochishni to‘xtatish davrida u yerga haftasiga 4200 yuk mashinasi kirib kelgan. Bu ko‘p oylarga yetadi», — deya Menser so‘zlarini keltiradi Reuters.

Vazirlar mahkamasi vakili Hamas a’zolarini o‘z jangchilari uchun oziq-ovqat yashirganlikda va uni sektorning oddiy aholisi bilan baham ko‘rmaganlikda aybladi. «Ularda semirib ketish epidemiyasini keltirib chiqarish uchun yetarli oziq-ovqat bor. Lekin siz semirayotganini ko‘rayotgan odamlar faqat Hamas a’zolaridir», — deya Menser so‘zlarini keltirgan AFP. Uning so‘zlariga ko‘ra, «Hamasda hech kim ochlikdan aziyat chekmayapti», «ta’minot bor, lekin Hamas bo‘lishmayapti».

Netanyahuning nutqi va Knessetdagi mushtlashuv

Bosh vazir Binyamin Netanyahu kecha Knessetda nutq so‘zladi. «Hamasga aytaman: garovga olinganlarni ozod qilmasangiz, bu siz tasavvur qila olmaydigan oqibatlarga olib keladi», dedi u.

Jerusalem Post xabariga ko‘ra, shu vaqtda parlament binosida mushtlashuv boshlangan. 7 oktyabrdagi xunrezlik qurbonlarining bir necha o‘nlab qarindoshlari qo‘riqchilar bilan to‘qnashgan. Kamida ikki kishi jarohat olgan.