Shavkat Mirziyoyev 11 mart kuni davlat tashrifi bilan Fransiyaga boradi

Shavkat Mirziyoyev Fransiya prezidenti Emmanuel Makronning taklifiga binoan 11-13 mart kunlari davlat tashrifi bilan ushbu mamlakatda bo‘ladi. Bu haqda Prezident matbuot xizmati xabar berdi.

Tashrif doirasida Parij shahrida oliy darajadagi muzokara va tadbirlar, Fransiyaning rasmiy va ishbilarmon doiralari bilan qator uchrashuvlar o‘tkazilishi rejalashtirilgan.

Bo‘lajak muloqotlar kun tartibidan ko‘p qirrali O‘zbekiston—Fransiya munosabatlarini yanada rivojlantirish va mustahkamlash masalalari o‘rin olgan.

Savdo-iqtisodiy va investitsiya-moliyaviy sohalarda o‘zaro manfaatli hamkorlikni kengaytirish, Fransiyaning yetakchi kompaniya va korxonalari bilan kooperatsiya loyihalarini ilgari surishga ustuvor e’tibor qaratiladi.

Sammit yakunida hukumatlararo va idoralararo bitimlar to‘plamini qabul qilish ko‘zda tutilgan.

Bundan tashqari, davlat rahbari YuNESKO Bosh direktori Odri Azule bilan uchrashib, tashkilot Bosh konferensiyasining 43-sessiyasiga tayyorgarlik ko‘rish va uni joriy yilning kuzida Samarqand shahrida o‘tkazishning amaliy jihatlarini muhokama qiladi.

«Bo‘lajak tashrif arafasida ko‘plab tadbirlar o‘tkazilayotganini ta’kidlash joiz. Xususan, 1 mart kuni Grets-Armenvil shahridagi «Uranoskop» observatoriyasi hududida buyuk alloma Abu Rayhon Beruniy siymosi aks etgan yodgorlik ochildi. Shu kunlarda Parij shahrida sog‘liqni saqlash, fan va ta’lim, madaniyat, turizm va biznes sohalarida forum va anjumanlar o‘tkazilmoqda. Tuluza, Lion va Nissada qo‘shma ishbilarmonlik tadbirlari bo‘lib o‘tadi», — deyiladi xabarda.

Eslatib o‘tamiz, Shavkat Mirziyoyev bundan oldin ikki marotaba Fransiyaga tashrif buyurgan. Birinchi marta 2018 yilda rasmiy tashrif bilan ushbu mamlakatga borgan edi. 2022 yilda ham O‘zbekiston prezidenti Emmanuel Makronning taklifiga ko‘ra Fransiyaga tashrif buyurgandi.