Budapeshtda O‘zbekiston va Vengriya hamkorligiga bag‘ishlangan tadbir bo‘lib o‘tdi

Vengriya poytaxti Budapeshtda “Markaziy Osiyo va Yevropa Ittifoqi Samarqand sammiti arafasida” mavzusida davra suhbati tashkil etildi, deb xabar bermoqda “Dunyo”.

Tadbir O‘zbekiston Tashqi ishlar vazirligi huzuridagi Tashqi siyosiy tadqiqotlar va xalqaro tashabbuslar markazi hamda Budapesht shahridagi Korvinest universiteti tadqiqot markazi hamkorligida o‘tkazilgan. Unda O‘zbekiston va Vengriyaning yetakchi ekspertlari, diplomatlari va olimlari, xususan, TIV Tashqi siyosat tadqiqotlari va xalqaro tashabbuslar markazi direktori Sanjar Valiyev hamda O‘zbekiston elchisi Oybek Shaxavdinov qatnashgan.

Tadbir davomida “Global o‘zgarishlar va umumiy muammolar kontekstida Yevropa Ittifoqi va Markaziy Osiyo o‘rtasidagi hamkorlikni qayta ko‘rib chiqish” hamda “Yevropa Ittifoqi va Markaziy Osiyo o‘rtasidagi hamkorlikning istiqbolli loyihalari” mavzusidagi sessiyalar bo‘lib o‘tgan. Har ikkala sessiyada hamkorlikni chuqurlashtirishga e’tibor qaratilgan.

Bundan tashqari, muhokamalarda Markaziy Osiyoda iqtisodiy o‘sish va ijtimoiy farovonlikka sezilarli ta’sir ko‘rsatishi mumkin bo‘lgan barqaror loyihalarni amalga oshirish uchun Yevropadan investitsiya va texnologiyalarni jalb qilishning qo‘shimcha imkoniyatlari ko‘rib chiqilgan.

Tadbir 3-4 aprel kunlari Samarqand shahrida bo‘lib o‘tadigan “Markaziy Osiyo – Yevropa Ittifoqi” sammiti oldidan tashkil etildi. Sammit doirasida birinchi Samarqand xalqaro iqlim forumi ham bo‘lib o‘tadi.

Tadbir davomida ikki tomon o‘rtasida ilmiy loyihalarni amalga oshirishga qaratilgan hamkorlik memorandumi imzolandi.