Buyuk Britaniya turistik vizani rasmiylashtirish uchun yig‘imlarni oshiradi

Buyuk Britaniya 9 apreldan boshlab turistik vizani rasmiylashtirish uchun yig‘imlarni oshiradi. Yig‘imlarning yangi narxi mamlakat hukumatining sayti orqali e’lon qilindi.

Qayd etilishicha, talabalar, ishchi vizalari va «iste’dodlilar vizasi»ni rasmiylashtirish uchun ham bojxona to‘lovlari oshiriladi.

Xususan, sayyohlik vizasini rasmiylashtirish yig‘imi o‘rtacha 10 foizga ko‘payadi. Yarim yillik viza narxi 127 funt sterling (2,1 mln so‘m), ikki yilgacha — 475 funt sterling (7,9 mln so‘m), besh yilgacha — 848 funt sterling, o‘n yilgacha — 1059 funt sterling bo‘ladi.

Bundan tashqari, Global Talent, talabalar va ishchi vizalari narxi toifasiga qarab kamida 7 foizga oshadi.

Britaniya Ichki ishlar vazirligiga ko‘ra, yig‘imning oshirilishi «immigratsiya va chegara tizimining davlat mablag‘lariga qaramligini kamaytirishga xizmat qiladi». Narxlarning oshirilishi hukumatga har yili qo‘shimcha 269 million funt sterling daromad keltiradi.