Mask ketadi, DOGE ham o‘z faoliyatini to‘xtatadi – Tramp

AQSh prezidenti Donald Tramp hukumat samaradorligi departamenti (DOGE) qachondir o‘z faoliyatini to‘xtatishini aytdi, chunki Ilon Mask faqat 130 kunga maxsus davlat xodimi sifatida ishlaydi, deb xabar berdi CNN.

Trampning ta’kidlashicha, Tesla va SpaceX egasi Mask o‘z kompaniyalarini boshqarishga qaytishi kerak. Ammo prezident uni imkon qadar uzoq muddat ushlab turishni istaydi, chunki uning «zakovati va qilgan ishlarini juda qadrlaydi».

Tramp so‘zlariga ko‘ra, federal agentlik rahbarlari «allaqachon ko‘p narsalarni o‘rganishgan» va o‘z ishini mustaqil ravishda davom ettirishi mumkin. Prezident ularning ba’zilari DOGE xodimlarini saqlab qolishni xohlashiga ishonch bildirdi. Trampning ta’kidlashicha, davlat idoralari rahbarlari o‘zi ishini «skalpel kabi» qilishi mumkin bo‘lgan vaqt keladi.

Mart oyi boshida AQSh Davlat kotibi Marko Rubio va Ilon Mask Oq uyda bo‘lib o‘tgan uchrashuv chog‘ida qizg‘in bahslashib qolgan edi. Prezident Tramp mojaroni jimgina kuzatgach, Rubioni qo‘llab-quvvatlab, uning ishini «a’lo» deb ta’rifladi.

Manbalarga ko‘ra, Rubio va Mask o‘rtasidagi ziddiyat uzoq yillik ildizlarga ega, xususan, avvalroq Davlat kotibi yurisdiksiyasida bo‘lgan USAID faoliyatining amalda tugatilishi bilan bog‘liq.