Маск кетади, DOGE ҳам ўз фаолиятини тўхтатади – Трамп

АҚШ раҳбари Доналд Трамп миллиардер Илон Маск давлат ишига вақтинча ёлланганини ва 130 кун ишлаганидан кейин кетишини айтди.

Фото: AFP/Getty Images

АҚШ президенти Доналд Трамп ҳукумат самарадорлиги департаменти (DOGE) қачондир ўз фаолиятини тўхтатишини айтди, чунки Илон Маск фақат 130 кунга махсус давлат ходими сифатида ишлайди, деб хабар берди CNN.

Трампнинг таъкидлашича, Tesla ва SpaceX эгаси Маск ўз компанияларини бошқаришга қайтиши керак. Аммо президент уни имкон қадар узоқ муддат ушлаб туришни истайди, чунки унинг «заковати ва қилган ишларини жуда қадрлайди».

Трамп сўзларига кўра, федерал агентлик раҳбарлари «аллақачон кўп нарсаларни ўрганишган» ва ўз ишини мустақил равишда давом эттириши мумкин. Президент уларнинг баъзилари DOGE ходимларини сақлаб қолишни хоҳлашига ишонч билдирди. Трампнинг таъкидлашича, давлат идоралари раҳбарлари ўзи ишини «скальпель каби» қилиши мумкин бўлган вақт келади.

Март ойи бошида АҚШ Давлат котиби Марко Рубио ва Илон Маск Оқ уйда бўлиб ўтган учрашув чоғида қизғин баҳслашиб қолган эди. Президент Трамп можарони жимгина кузатгач, Рубиони қўллаб-қувватлаб, унинг ишини «аъло» деб таърифлади.

Манбаларга кўра, Рубио ва Маск ўртасидаги зиддият узоқ йиллик илдизларга эга, хусусан, аввалроқ Давлат котиби юрисдикциясида бўлган USAID фаолиятининг амалда тугатилиши билан боғлиқ.

#АҚШ #Илон Маск #Доналд Трамп