Tomorqa uchastkalaridan foydalanish bo‘yicha choralar tasdiqlandi

Vazirlar Mahkamasining «Aholi tomorqalari va dehqon xo‘jaliklari yer maydonlaridan samarali foydalanishning qo‘shimcha chora-tadbirlari to‘g‘risida»gi qarori qabul qilindi.

Dehqon (fermer) xo‘jaliklari va tomorqa uchastkalaridagi bo‘sh yer maydonlari to‘g‘risidagi ma’lumot «Onlayn Mahalla» platformasida onlayn rejimda shakllantiriladi. 2025 yil 1 iyunga qadar aholi tomorqalarining yer maydonlari to‘liq xatlovdan o‘tkazilishi yakunlanadi va ularning hisobi yuritiladi.

Namunali mahallalar joylashadigan tuman (shahar)lardagi tomorqa uchastkalari va ijaraga berilgan yer maydonlarining 75 foizi bosqichma-bosqich bir xil turdagi yuqori daromadli mahsulotlar yetishtirish uchun o‘tkaziladi. Ekin va mahsulotlarni yetishtirish reja-grafigi joriy yilning 10 apreliga qadar tasdiqlanadi.

Muvaffaqiyatli tadbirkorlar yuqori daromadli, sifatli urug‘ va ko‘chatlarni yetkazib berish, ekish va ijara asosida ajratilgan har bir yer uchastkasidan samarali foydalanishni tashkil etadilar.

Joriy yilning may oyiga qadar mahallalarda amalga oshiriladigan «yashil» va resurs tejamkor loyihalarning manzilli ro‘yxati tasdiqlanadi.

Tomorqa uchastkalarida shuningdek yengil konstruksiyali issiqxonalar, intensiv bog‘lar, tokzorlar, anorzorlar, gulchilik va ko‘chatchilik plantatsiyalarini yaratish, yuqori rentabelli va eksportbop qishloq xo‘jaligi mahsulotlarini yetishtirish rejalashtirilgan.

#tomorqa #uchastka