“Gul deb o‘ylabman” – Urgutda tomorqasida 229 tup kannabis yetishtirgan ayol ozodlikdan mahrum qilindi

Samarqand viloyatining Urgut tumanida 5 farzandning onasi bo‘lgan ayol tomorqasida taqiqlangan o‘simlik yetishtirgani uchun jinoiy jazoga tortildi. Kun.uz sud hukmi bilan tanishdi.

Sud hujjatida keltirilishicha, 1982 yilda tug‘ilgan M.U. o‘z yashash hovlisi tomorqasiga 2025 yil aprel oyi o‘rtalarida kelgusida o‘tkazish maqsadini ko‘zlab kannabis urug‘larini ekkan. So‘ngra unib chiqqan 229 tup giyohvand o‘simlikni parvarishlab kelgan.

2025 yil 4 avgustda o‘tkazilgan tezkor profilaktik tadbirda ushbu kannabislar ashyoviy dalil tariqasida hujjatlashtirib olingan. Samarqand viloyat IIB Ekspert-kriminalistika markazining xulosasiga ko‘ra, M.U. yetishtirgan o‘simlik tarkibida tetrogidrokannabinol giyohvand moddasi borligi va ular kannabis ekani tasdiqlangan.

Ayol sudda o‘z aybiga iqrorlik bildirgan va kannabisni gul deb o‘ylaganini aytgan.

“Turmush o‘rtog‘im boshqa viloyatlarda ustachilik qiladi. Uyda xo‘jalik ishlari bilan o‘zim shug‘ullanaman. Aprel oyida Urgut tumani Dehqonobod mahallasidagi dehqon bozorda notanish ayoldan pomidor ko‘chati va gul urug‘i sotib oldim. Ko‘chatlarni hovli tomorqasiga ekdim, urug‘larni makkajo‘xori ichiga sepib chiqdim. Gul deb ekkan urug‘larim unib chiqqanda gullamadi. Ammo katta bo‘lgach gullashi mumkin, deb parvarishlab keldim. Giyohvand o‘simlik ekkanimni bilmadim, bilganimda parvarishlamagan bo‘lardim”, degan M.U. o‘z ko‘rsatmasida.

Shuningdek, u kannabisni biror kishiga sotish maqsadi bo‘lmaganini, qilmishidan pushaymonligini aytib, suddan yengillik so‘ragan.

JIB Urgut tuman sudining 2025 yil 20 oktyabrdagi hukmi bilan M.U. Jinoyat kodeksining 270-moddasi (Taqiqlangan ekinlarni yetishtirish) 1-qismi va 273-moddasi (Giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 2-qismida nazarda tutilgan jinoyatlarni sodir etganlikda aybli deb topilgan. Unga 3 yil 8 oy muddatga ozodlikdan mahrum qilish jazosi tayinlangan. Jazoni umumiy tartibli koloniyada o‘tash belgilangan.