Atlantika okeanida 1000 bochkadan ortiq radioaktiv chiqindilar topildi

Xalqaro tadqiqot guruhi Atlantika okeanining shimoli-sharqiy qismida 1000 bochkadan ortiq radioaktiv chiqindilarni aniqladi. Bu haqda Fransiya milliy ilmiy tadqiqot markaziga tayanib Tagesschau xabar berdi.

Olimlarning fikricha, Atlantika okeanining bu qismida 3000-5000 metr chuqurlikda 200 ming bochkadan ortiq radioaktiv chiqindilar mavjud. Ular suv bosimiga bardosh berishga mo‘ljallangan, ammo radiatsiyani to‘liq ushlab qololmaydi. Bochkalarning holati qandayligi haqida hech narsa ma’lum emas.

1950-1980 yillar oralig‘ida bir qancha davlatlar yadroviy chiqindilarni bochkalarda okeanga tashlagan. 1993 yilda bu amaliyot butunlay taqiqlangan.

Iyun oyining o‘rtalarida to‘rt haftalik tadqiqot ekspeditsiyasi Fransiyaning Brest shahridan «L'Atalante» kemasida dengizga chiqdi. Uning doirasida olimlar chiqindilarning mahalliy ekotizimga ta’sirini baholashni va bochkalar joylashuvi xaritasini yaratishni rejalashtirmoqda.