Rossiyada «Golos» harakati o‘z faoliyatini to‘xtatganini e’lon qildi

«Golos» saylovchilar huquqlarini himoya qilish bo‘yicha Butunrossiya jamoat harakati o‘z faoliyatini to‘xtatdi. Tegishli bayonot uning rahbariyati tomonidan 8 iyul, seshanba kuni e’lon qilindi.

«Mamlakatimizda samarali institutlar va adolatli saylovlar o‘tkazilishini ta’minlash uchun ko‘p yillar davomida vaqt va kuchini sarflagan barchaga rahmat», — deyiladi hujjatda. «Golos» hech qachon o‘z maqsadini u yoki bu siyosiy kuchning g‘alabasi sifatida ko‘rmagan, chunki saylovni kuzatish siyosiy faoliyat emas, balki Rossiyaning konstitutsiyaviy tuzumini va fuqarolarning davlat tomonidan kafolatlangan huquqlarini himoya qilish usulidir».

Ta’kidlanishicha, faoliyatni to‘xtatish qarori «Golos» hamraisi Grigoriy Melkonyansga jinoiy ish bo‘yicha Moskvaning Basmanniy sudi tomonidan may oyida chiqarilgan hukm munosabati bilan qabul qilingan. U Rossiyada «nomaqbul» nodavlat tashkilot faoliyatini tashkil etishda ayblanib besh yilga qamaldi.

«Ushbu sud qarori boshqa tanlov qoldirmaydi, chunki u nafaqat «Golos»ning barcha ishtirokchilariga, balki maslahat va yuridik yordam so‘ragan odamlarning ham jinoiy javobgarlikka tortilishi bilan tahdid soladi», — deya tushuntirdi harakat. «Bizning do‘stimiz va hamkasbimiz Grigoriy Melkonyansning hibsga olinishidan faqat bitta maqsad bor edi – «Golos»ning ovozini o‘chirish», — deya ishonch bildirdi bayonot mualliflari.