YeI RFPI va uning shu’ba korxonalari bilan operatsiyalarni to‘liq taqiqladi

18 iyul, juma kuni Yevropa Ittifoqi tomonidan ma’qullangan Rossiyaga qarshi sanksiyalarning 18-to‘plami Rossiya to‘g‘ridan to‘g‘ri investitsiya jamg‘armasi (RFPI) va uning shu’ba korxonalari bilan har qanday operatsiyalarni taqiqladi. Yangi cheklovlar fonida Rossiya to‘g‘ridan to‘g‘ri investitsiya jamg‘armasi rahbari Kirill Dmitriyev Yevropa davlatlarini «sanksiyalar spiralini aylantirish» o‘rniga muloqotga chaqirdi.

Dmitriyevning so‘zlariga ko‘ra, RFPIga qarshi sanksiyalarning kuchayishi jamg‘arma go‘yoki «Ukraina mojarosini tartibga solish» va «Rossiya va AQSh o‘rtasida muloqot o‘rnatish»ga ko‘maklashayotgani bilan bog‘liq. RFPI rahbarining so‘zlariga ko‘ra, Yevropa Ittifoqi sanksiyalari yevropaliklarning o‘zlari uchun «buzg‘unchi»dir.

Fevral va mart oylarida Kirill Dmitriyev Ar-Riyodda Rossiya Federatsiyasi va AQSh delegatsiyalari o‘rtasidagi muzokaralarda ishtirok etgan, aprel oyida esa Vashingtonga kelgan va u yerda Donald Tramp jamoasi vakillari bilan uchrashgan. CNN telekanalining xabar berishicha, AQSh hukumati Dmitriyevga qarshi sanksiyalarni vaqtincha bekor qilgan, shunda Davlat departamenti unga kirish vizasi berishi mumkin. RFPI rahbari AQShda tahsil olgan va ishlagan.

Aprel oyida Korrupsiyaga qarshi kurashish jamg‘armasi (FBK) Kirill Dmitriyevga nisbatan surishtiruvni e’lon qildi. FBK ma’lumotlariga ko‘ra, Dmitriyev, uning oila a’zolari va unga aloqador kompaniyalar Rossiya, Birlashgan Arab Amirliklari va Yevropada umumiy qiymati 7,5 milliard rubllik ko‘chmas mulkka ega. Davlat xizmatiga kirishdan oldin Rossiya to‘g‘ridan to‘g‘ri investitsiyalar jamg‘armasi rahbarining barcha ko‘chmas mulkining qiymati 420 million rublni tashkil etgan. Surishtiruv mualliflarining fikricha, Dmitriyevning rasmiy maoshi qimmat ko‘chmas mulk sotib olish uchun yetarli bo‘lmasdi.