Toshkent viloyatida tabiatga qariyb 17 mlrd so‘m zarar yetkazildi

Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi hamda viloyat Ichki ishlar bosh boshqarmasi xodimlari bilan hamkorlikda Bekobod tumanida navbatdagi reyd tadbirlari o‘tkazildi.

Foto: Ekologiya, atrof-muhitni muhofaza qilish va iqlim o‘zgarishi vazirligi

Reyd davomida huquqbuzarlar F.T. va U.Q. tomonidan Bekobod tumani «Achamayli» MFY hududidan oqib o‘tuvchi Sirdaryo daryosi o‘zanidan yuk avtomobili hamda maxsus yuklovchi transport vositasi yordamida noqonuniy ravishda qum-shag‘al aralashmasi ortib olib chiqib ketilayotgani aniqlandi.

Bu bilan O‘zbekiston prezidentining 2024 yil 1 yanvardagi «Suv havzalarida noruda materiallarni qazib olishni tartibga solish chora-tadbirlari to‘g‘risidagi»gi farmon hamda Vazirlar Mahkamasining qarori ilovasi bilan tasdiqlangan «Noruda materiallarni noqonuniy qazib olishda tabiiy obektlarga yetkazilgan zararni hisoblash tartibi to‘g‘risida»gi nizomning tegishli bandiga asosan hisoblanganda tabiatga 16 milliard 912 million 862 ming 600 yuz so‘m zarar yetkazilgan.