Toshkent viloyatida “Yagona buyurtmachi xizmati” mas’uliga nisbatan korrupsiya ishi qo‘zg‘atildi

2024 yil dekabr oyida Toshkent viloyatining Bekobod tumanida foydalanishga topshirilgan yangi maktabgacha ta’lim tashkiloti binosi bo‘yicha prokuratura tomonidan qurilishga oid tekshiruv ishlari olib borilgan. Tekshiruv jarayonida obekt qurilishini amalga oshirgan MChJ mansabdor shaxslari tomonidan 176 million so‘mlik kamomad aniqlandi.

Shu asosda ularga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, hujjatli taftish tayinlangan.

Bu holatdan boxabar bo‘lgan “Yagona buyurtmachi xizmati” davlat muassasasi bosh yuriskonsulti o‘zining mansabdor tanishlari orqali taftish tekshiruvi natijalarini “ijobiy hal qilib berish”ni va’da qiladi. Evaziga u MChJ rahbaridan 8 400 AQSh dollari talab qiladi.

Davlat xavfsizlik xizmatining Toshkent viloyati bo‘yicha boshqarmasi xodimlari tomonidan o‘tkazilgan tezkor tadbirda bosh yuriskonsult kelishilgan pul mablag‘ini olgan paytida ashyoviy dalillar bilan ushlanadi.

Unga nisbatan Jinoyat kodeksining 168-moddasi 3-qismi “v” bandi va 28, 211-moddasi 1-qismi bilan jinoyat ishi qo‘zg‘atilgan. Rasmiy ma’lumotga ko‘ra, unga nisbatan protsessual tartibda “qamoq” ehtiyot chorasi qo‘llangan.

Hozirda mazkur holat yuzasidan tergov harakatlari davom etmoqda.