Bloomberg: YeI sanksiyalari Hindistondagi "Rosneft" zavodiga zarba berdi

Kema egalari va neft treyderlari Hindistonning Nayara Energy neft kompaniyasi bilan hamkorlik qilishdan bosh tortishni boshladi, deb yozadi 22 iyul, seshanba kuni Amerikaning Bloomberg agentligi. Bu Yevropa Ittifoqi kompaniyaga nisbatan sanksiyalar kiritganidan keyin sodir bo‘ldi, chunki uning 49,14 foiz aksiyalari Rossiyaning «Rosneft» davlat korporatsiyasiga tegishli.

Bloomberg ma’lumotlariga ko‘ra, kamida bitta neft tankeri 20 iyul kuni Hindistonning Vadinar portidagi neftni qayta ishlash zavodidan yonilg‘i olishdan bosh tortgan. Bu Marshall orollari bayrog‘i ostida suzib yurgan Talara kemasi. Buyurtma 18 iyulda – YeI sanksiyalarining 18-paketi qabul qilingan kuni bekor qilindi. Brokerlarning so‘zlariga ko‘ra, kema egalari Nayara bilan ishlashdan ehtiyot bo‘lyapti, bu ishlab chiqarilgan yonilg‘ini eksport qilishi yoki neft yetkazib berishga birdek taalluqli.

Nayara o‘z manfaatlarini himoya qilish uchun «huquqiy va boshqa variantlarni» o‘rganayotganini aytdi. Xususan, avvalroq ma’lum bo‘lishicha, Hindiston kompaniyasi Yevropa Ittifoqining qora ro‘yxatiga tushganidan so‘ng, sanoatda to‘lov yuk jo‘natilgandan keyin 15-30 kun o‘tgach amalga oshirilsa-da, mijozlardan oldindan to‘lov yoki tijorat akkreditivini talab qila boshlagan.

O‘z navbatida, «Rosneft» Yevropa Ittifoqining sanksiyalarini «asossiz va noqonuniy» deb atagan bayonot e’lon qildi, chunki kompaniya Hindiston neftni qayta ishlash zavodining nazorat paketi egasi emas. Rossiya konsernining ta’kidlashicha, korxona mustaqil direktorlar kengashi tomonidan boshqariladi.