Moskvada o‘zbekistonlik erkak uchinchi qavatdan yiqilib, halok bo‘ldi

Rossiya poytaxti Moskva shahrida migrant mehmonxonadan qochishga urinib, derazadan yiqilib tushdi, deb xabar berdi MK.

Baxtsiz hodisa 25 iyulga o‘tar kechasi shahar janubidagi butik-mehmonxonada sodir bo‘lgan. Dastlab guvohlar uchinchi qavat derazasida ichki kiyimda turgan erkakni ko‘rgan. U kiyimlarini qo‘lida ushlagan holda avval konditsioner ustiga sakragan, so‘ngra ikkinchi qavat qiyaligiga tushishga qaror qilgan.

Biroq, urinish muvaffaqiyatsiz yakunlanib, erkak pastga qulagan va og‘ir jarohat tufayli halok bo‘lgan. Jabrlanuvchi 30 yoshli O‘zbekiston fuqarosi bo‘lib chiqdi, uning ismi-sharifi xabarda keltirilmadi. Jabrlanuvchining akasi uni voqea joyida tanigan.

Guvohlarning ta’kidlashicha, erkak kimdandir qochmoqchi bo‘lgandek shoshilinch harakat qilgan. Holat yuzasidan tekshiruv olib borilmoqda.