Surxondaryoda yuk avtomobillari ishlab chiqarish korxonasi ishga tushdi

«O‘zeltexsanoat» uyushmasi hamda Surxondaryo viloyati hokimligi ko‘magida yirik ishlab chiqarish quvvatiga ega korxona faoliyati boshlandi.

Denov tumanida umumiy qiymati 30 million dollar bo‘lgan, yillik quvvati 5 ming dona mahsulot ishlab chiqarishga mo‘ljallangan yengil yuk avtomobillari ishlab chiqarish loyihasi ishga tushirildi. Loyiha doirasida 150 ta yangi ish o‘rni yaratildi.

Korxona «Humo New Energy» MChJ tomonidan mustaqillikning 34 yilligi arafasida ishga tushirilgan.

Ochilish marosimida viloyat hokimi Ulug‘bek Qosimov, davlat va jamoat tashkilotlari vakillari, nuroniylar hamda faollar ishtirok etdi. Mehmonlar ishlab chiqarish jarayonlari bilan tanishib, tayyor yuk avtomobillarini ko‘zdan kechirdi.

«Korxonada ishlab chiqarilayotgan arzon va sifatli yengil yuk mashinalarining asosiy butlovchi qismlari mahalliy sharoitda tayyorlanishi aholiga hamyonbop va ishonchli transport vositalari taqdim etish imkonini yaratadi», deyiladi xabarda.

Loyihaning keyingi bosqichida yengil yuk elektromobillari ishlab chiqarish yo‘lga qo‘yiladi.